Abouzaid

اتولدت في شهر سبتمر عام ١٩٩٢، مش هقولك يوم ايه عشان ما تعرفش معلومات كتير عني وتسرق حسابي البنكي :)، اللي شايلني في الصورة أبويا ربنا يبارك في عمرة وكنا في أرض كرنب جمبنا.

بسبب اني ماكنتش بحب الكلية أوي، وكنت لسه بستكشف عالم الانترنت وكنت مبهر جدااااا - اه، انا دخلت عالم الانترنت متأخر نسبياً- ووقتها كان المحتوى التعليمي باللغة العربية قليل أووووووي، وكنت بتعلم برامج زي الفوتوشوب وأفترايفكت من كورسات موقع ليندا وقتها اللي هو دلوقتي LinkedIn Learning.

وبعدين قلت ليه محاولش أملئ الفراغ دا وبالفعل بدأت أعمل كورس لشرح الفوتوشوب بالعربي على يويتوب ومن هنا بدأت رحلتي مع يويتوب.

بدأت أهتم بيوتيوب واستثمر واشتريت جرين سكرين وكاميرا وشوية اضاءة وكمان اكتشفت ان فيه ناس كتير عندها مشاكل في الانجليزي، وانا كنت كويس في الانجليزي وبحبه ومن هنا بدأت أشارك مع الناس شوية نصائح لتحسين اللغة الانجليزية ومن هنا كانت الانطلاقة.

إثناء شغلي في مرسى علم كنت بشتغل حوالي ٢٢ يوم هناك وأرجع البيت ٥ أيام، كنت في الأيام دي بصور ٤ فيديوهات في البيت وبعدين أخد الفيديوهات معايا على اللابتوب وامنتجها واعمل شغل الجرافيكس والافترايفكت وانا في مرسى علم، واللي ساعدني ان المشروع اللي كنت شغال فيه كان بيتوقف كتير.

الحمد لله دلوقتي، أقدر أقول ان دا أفضل قرار اخدته في حياتي، والموضوع فرق بشكل أنا ماكنتش أقدر أتصوره بصراحة، القناة بدأت تكبر رويداً رويدا والمحتوى تطور من الانجليزي لفيديوهات عن المذاكرة والانتاجية وإدارة المهام وتنظيم الوقت والطاقة.

تنوع المحتوى، ساعد في وصول قناة دروس أونلاين لعدد كبير من المتابعين لحد ما وصلنا ولله الحمد قرب ٧ مليون مشترك.